На падворку навіна:
Певень знёс яечка.
“Праўда гэта ці мана?” –
Думае авечка.

Запытала ў барана:
Той – ні ку-ка-рэ-ку.
Закудахтала яна
І пайшла ў аптэку.

А насустрач ёй – індык.
Рохкае лагодна
І паказвае язык,
Лічыць, гэта модна.

І авечку, і мяне
Збілі з толку дужа.
Хто кудахча? Хто пяе?
Разбярыся, дружа.

Загадка

Звісае з даху востры цвік.
Я да яго ўжо прывык.
На сонцы ён кудысьці знік.
І што за цвік? Куды ён знік?

Ірына САСНА