Васіль ЖУКОВІЧ

Дала кароўка малака

Красуля з зялёнага лугу прыйшла,
Вядро малака гаспадыні дала.
Па кубках бабуля яго разлівала,
Любімых унукаў усіх частавала.

Нэлі ТУЛУПАВА

Кракадзіл

Я зляпіла кракадзіла,
Падарыць хацела Дзіне.
Дзіна адмаўляецца:
– Кракадзіл кусаецца!

– Смешная ты, Дзіна,
Ён жа з пластыліну!

Раіса БАРАВІКОВА

Майстар

Сёння мой грузавічок
Лёг раптоўна на бачок.
Каб не быў такім ён кволым,
Я падпраўлю яму колы.

Вацлаў Хадасевіч

Сунічкі

На паляне, за крынічкай,
Назбіраў Алесь сунічак.
Дзякуй, сонечны зацішак:
Ягад – поўненькі гладышак.