“Вясёлцы”, любімаму часопіу беларускіх дзяцей, спаўняецца ў красавіку пяцьдзесят пяць гадоў. Вы,чытачы “Вясёлкі”, атрымалі 660 дзівосных часопісаў, своеасаблівых кніжак. Гэта бібліятэка дзіцячага чытання – сапраўдны ваш скарб.

Уявіце, тыя, хто чытаў першыя нумары “Вясёлкі”, цяпер ужо самі дзядулі і бабулі, бацькі вашы. “Вясёлка” застаецца жаданым госцем у хатах і кватэрах. Яна, як і даўней, нястомна вучыць чытачоў любіць сваю Айчыну, шанаваць родную мову, паважаць старэйшых людзей, якія вядуць вас у імклівае жыццё дваццаць першага стагодзя.

Нам прыемна, сябры, што вы актыўна падтрымліваеце свой родны часопіс, сябруеце з ім, выпісваеце і чытаеце яго. І мы, рэдакцыя, вырашылі пазнаёміць вас з некаторымі даўнейшымі старонкамі “Вясёлкі”.

Веру, “Вясёлка” была, ёсць і будзе верным сябрам юных нашчадкаў Беларусі. А яе супрацоўнікі і аўтары будуць нястомна пракладваць духоўныя сцяжынкі да вашых сэрцаў.

Уладзімір ЛІПСКІ,
галоўны рэдактар часопіса “Вясёлка”, лаўрэат Дзяржаўнай прэміі Беларусі.