Дванаццаты нумар «Вясёлкі», прысвечаны скандынаўскай краіне Швецыі, запомніцца чытачам надоўга. Па-першае, рэдакцыя прадставіла апошні нумар часопіса у гэтым годзе. Па-другое, арганізатары ўлічылі зімовую пару, а таксама адсутнасць снегу…

На Карнавал завітаў пасол Швецыі ў Беларусі Штэфан Эрыксан. Гэты госць спадабаўся маленькім гледачам. Вясёлы Штэфан сказаў, што яму ў Беларусі вельмі падабаецца. Па роднай жа Швецыі, канешне, сумуе, бо разам з хорам натхнёна спяваў песні на сваёй мове.

– Адзін з маіх падарункаў вам і «Вясёлцы» – дыск са шведскімі казкамі. Але яны запісаны па-беларуску. Спадзяюся, што гэтае знаёмства пойдзе вам на карысць, – сказаў Штэфан Эрыксан, які, дарэчы, добра размаўляе па-беларуску.

У вялікім чырвоным мяшку прыплылі падарункі з адзнакай «Зроблена ў Швецыі». Аднак так проста ў рукі дзецям яны не даваліся. Спачатку патрэбна было адказаць на пытанні. А яны былі розныя: пра Скандынавію, вікінгаў, колеры сцяга, нават пра каралеву Швецыі спыталі ў прысутных. Прыемна, што і пра Швецыю нашы дзеці, як аказалася, шмат чаго ведаюць!

Кіраваў усёй працэсіяй Кароль, а дапамагалі яму Прынц і Прынцэса, таксама Лесавік. Чараўніца, якая спачатку не давала святкаваць Новы год, у канцы ператварылася ў Прынцэсу, нават украдзены мяшок з падарункамі Дзеду Марозу вярнула. Дзед Мароз са Снягуркай, стаміўшыся і змерзнуўшы пасля доўгай дарогі, спачатку патанцавалі, а потым пагулялі з дзецьмі.

Прыгожыя касцюмы, вясёлыя ўсмешкі, рознакаляровы свет…

Былі песні, танцы, ёлка з аганьчыкамі і шарыкамі. А яшчэ быў снег! Хай сабе несапраўдны, але затое цудоўны!

Марыя Базулька
фота аўтара