Малюнак

Аблачынкі, сонца круг,

А пад імі – рэчка, луг…

І паставіў подпіс Дзіма:

“Гэта ўсё – мая Радзіма!”

У двары

“Звер! Тут звер!” – крычыць Гануля.

І ў адказ яна пачула:

“Ну, які ж я звер, дзівачка,

Я – маленечкі сабачка!”

Ліса і Пугач

Плача Ліска: не да спраў!

Вецер шапачку сарваў.

І закінуў на яліну,

Дзе стары Пугач грэў спіну.

– Скінь хутчэй! – крычыць Ліса. –

У мяне ёсць каўбаса…

І сказаў Лісе Пугач:

– Я прашу цябе, не плач!

Ёсць Жыраф у заапарку,

Ён тваю дастане шапку.

Раніцай

Лапкай прывітаў Цяцёрку

І хутчэй схаваўся ў норку:

Не садзіцца ён на сук,

Бо не птушка, а Барсук!