Крышку пра кніжку
Вядомая пісьменніца Раіса Баравікова сабрала цікавы і крыху нечаканы для беларускай дзіцячай літаратуры зборнік. Пад адной вокладкай з назвай “Касмічная кніга ў творах беларускіх пісьменнікаў” аб’яднаны казкі, вершы, невялікія нарысы пра тую прастору, што шмат шырэй за нашу планету Зямля. Уладзімір Ліпскі, Алена Масла, Пятро Васючэнка, Генадзь Ануфрыеў, Наталля Ігнаценка, Серж Мінскевіч, Генадзь Аўласенка, Кацярына Хадасевіч-Лісавая, Янка Сіпакоў, Алесь Марціновіч і іншыя аўтары запрашаюць вас, сябры, у касмічныя падарожжы, расказваюць пра зоркі і невядомыя планеты. Назвы ў твораў дастаткова красамоўныя: “Палярная зорка”, “Палёт да Млечнага Шляху”, “Падарожжа ў Зніч-гарадок”, “Трансплутонавыя афеліі”, “Вася Лайдачкін і іншапланецянін”… А адзін з раздзелаў кнігі – ужо з рэалістычных сюжэтаў: у невялікіх нарысах расказваецца пра будаўніцтва касмадрома Байканур, пра нашых землякоў Пятра Клімука, Уладзіміра Кавалёнка, Сяргея Блажко, іншых вучоных і канструктараў, якія нямала зрабілі для асваення космасу.
Дапамагае развіваць фантазію, дапаўняючы касмічныя сюжэты, і мастачка Марыя Міцкевіч. Малюнкі настолькі выразныя, што, гледзячы на іх, уяўляеш сябе ў кабіне касмічнага карабля, гатовы сам хоць зараз выйсці ў адкрытую касмічную прастору.
Выпусціла кнігу ў свет выдавецтва “Літаратура і Мастацтва”.
Алесь Карлюкевіч
Малюнкі прыгожыя ў гэтай кнізе.
Чытала з задавальненнем цікавыя казкі пра добрую дзяўчынку Разальку ў цёмным царстве ведзьмака, пра падарожжа маленькага хлопчыка ў зніч-гарадок, пра прыгоды майго любімага Антоніка-Поніка і навучылася, як можна зрабіць штучныя зорныя каменьчыкі.