Учора, 25 красавіка, часопіс “Вясёлка” презентаваў чацвёрты нумар.
У гэтым годзе галоўны герой дзіцячага часопіса Вася Вясёлкін трапляе ў розныя краіны. У январскім нумары ён пабываў у Кітаі, у лютым паглядзеў на Літву. Трэці нумар “Вясёлкі” прысвечаны Польшчы. З красавіцкага ж выпуску чытачы могуць даведацца пра традыцыі краіны-суседкі Расіі.

Галоўны рэдактар часопіса “Вясёлка” Уладзімір Сцяпанавіч Ліпскі ва ўступным слове паабяцаў прысутным, што самыя актыўныя абавязкова атрымаюць пасхальныя яйкі з лагатыпам часопіса, а таксама свежы нумар “Вясёлкі”. Але прысутныя і без таго энергічна пляскалі ў далоні, танцавалі і падпявалі.

Пасол Расіі ў Беларусі, на жаль, прыйсці на свята не змог. А таму пасланне ад яго зачытаў расійскі сябар “Вясёлкі”, а таксама паэт і кампазітар Іосіф Рогаль. У лісце пасол падзякаваў дзіцячаму часопісу за добрую справу, якую ён робіць, знаёмячы маленькіх беларусаў з краінамі свету. Нагадаў і аб тым, што Беларусь і Расію родняць агульныя справы, а таксама гісторыя, літаратура і мастацтва.

На прэзентацыі чацвёртага нумара прысутным адкрыўся невялікі сакрэт. Аказваецца, “Вясёлка” сумесна са знакамітым скульптарам Уладзімірам Жбанавым распрацоўваюць праект скульптуры Васі Вясёлкіна. Дзеяч мастацтва заўважыў, што дзяцінства – гэта самы лепшы перыяд жыцця, калі чалавек прырастае да чагосьці душою, а ўжо потым пачынае прадуктыўнае развіццё.

Але на свяце не толькі гаварылі. Чыталі вершы, спявалі песні, праводзілі конкурсы. Дзеці ж спецыяльна да свята напісалі песню, якая, па словах намесніка галоўнага рэдактара часопіса Анастасіі Радзікевіч, можа стаць гімнам “Вясёлкі”. Гледачы разам з беларускай пісьменніцай і паэтэсай Раісай Баравіковай чыталі верш Агніі Барто “Наша Таня громко плачет…» Таксама адбылося знаёмства з Расіяй як краінай, з яе казкамі і традыцыямі.

Усё гэта можна прачытаць у чацвёртым нумары часопіса. Таксама ў выпуску можна знайсці вершы Сяргея Міхалкова, Агніі Барто ў перакладзе Міколы Маляўкі. Пра Вялікдзень дзеткам расказала рубрыка “Каласавічок”. Уладзімір Ліпскі ж працягвае знаёміць маленькіх беларусаў з Радзімай. У красавіцкай “Вясёлцы” расказваецца пра Нароўлю.

Галоўны рэдактар запрасіў усіх і на наступную сустрэчу, якая адбудзецца 30 мая ў тым жа Доме Дружбы. Прэзентаваць “Вясёлка” будзе пяты нумар, прысвечаны Азербайджану. Пасля ж красавіцкага свята ва ўсіх прысутных яшчэ доўга будзе захоўвацца добры настрой, а ў душы – сонейка, якое суправаджала мерапрыемства ўвесь час.