Васіль ВІТКА
Гасцінцы

У хусцінцы –
Тры гасцінцы: 

Табе, братка, –
Шакаладка, 

Табе, дружок, –
Піражок, 

А сястрычцы –
Тваражок, 

Табе, свінка, –
Хусцінка: 

Умыйся,
Утрыся
і спаць
Кладзіся.   

Леанід ДРАНЬКО-МАЙСЮК 
Хомка – рыбак і кухар 

Лепей за яго няма
Рыбака на свеце –
Хомка шчупака паймаў
Кілаграмаў з дзесяць! 

Кухарам усім на здзіў
На альховым вецці
Хомка шчупака зварыў –
Ешце рыбу, дзеці! 

Хомка здолеў, Хомка змог,
Бо жыве не ў клетцы;
Ён – французскі, ён – бульдог
З беларускім сэрцам! 

Сяргей ПАНІЗНІК
Бутэрбродаўская вежа

На абед мой брат – хадок,
За талеркай ён – ядок. 

А ў мяне не проста ежа –
Бутэрбродаўская вежа. 

Не ўмяшчаецца ў мой рот
Маг-до-наль-даў-скі бутэрброд. 

Васіль ЖУКОВІЧ
Бабка ўнучка частавала 

Унуку свайму гарадскому
(Унук той вядомы як неслух)
Бабулечка жартам, вядома,
Чырвоненькі перчык паднесла.
Той перчык, як нос Бураціна,
Быў востранькі і некароткі.
­– Кусай, – кажа бабка Хрысціна
Рыгорку, – ён, мабыць, салодкі.
Нарэшце паслухаўся неслух:
Кусае, жуе перац горкі.
– Ты што мне, бабуля, прынесла?! –
Няўцямна пытае Рыгорка. –
Раней мне давала бананы,
А зараз… язык мой палае!..
– Раней жа ты быў паслухмяны,
І розніца тут немалая. 

Галіна НІЧЫПАРОВІЧ
Натка 

Не дзяўчынка – парасятка.
Ну вядома ж, гэта Натка.
Шчочкі, лоб і нос кірпаты
Перапэцканы ў Наты. 

Малюнкі Веры Рэшта

Ела кашу, суп, цукеркі,
На стале ляжаць паперкі.
Запівала малачком,
Аж сцякае ручайком. 

Ўсё сама – карміць не трэба,
Толькі вось чаму без хлеба?
– Крошак многа нараблю,
Непарадак не люблю.