Нерэжымныя кацяняты

У гадзінаў роўна ў пяць
Кацянят паклалі спаць.
Па-пад шафы ды сталы
Пахаваўся род малы.

Патлумачыць цяжка ім,
Што такое ёсць рэжым.

Добрай раніцы, каток!

Надвячоркам і пад ранак
Замест ранішніх зарадак
Драпатапа – кот Пярэсцік
Мусіць плотненька пад’есці,

Потым смачна аблізнуцца,
Гаспадыні ўсьміхнуцца.
Паміж кубкаў прашмыгнуцца,
Спінкай гнуткаю прагнуцца.

Годны коцік

Па платах насіцца годзе!
Я іду па пераходзе.
Перарос бяду, нястачу.
Йду на выстаўку кашачу.

Кот-верхалаз

Кот у нас ― верхалаз.
Ў руху ён увесь час.
Скача ўверх, скача ўніз,
Правярае карніз.

Кот Кузьма

Як надарыцца зіма
Здаравее кот Кузьма.
Паступае мудра ―
Апранае футра.

Ходзіць на работу
Проста праз сумёты.
Кантралюе хлеў, амбар
Як сапраўдны гаспадар.

Лье бабуля кіску
Малачко у міску.
Доўга спіць ля печы,
Грэе лапы, плечы.

Ў маразы і сцюжы
Кузя бодры, дужы.
Не трэба ватоўка,
Грэе загартоўка!

Рыбнадзор

Рыбнадзорам я працую,
Вось карасікаў вартую.
Як сказаў сусед-палкоўнік —
Вельмі добры я ахоўнік!