Васіль Гурскі «Маленькія памочнікі»
Пісьменніку Васілю Гурскаму – 90 гадоў
Васіль Гурскі
Маленькія памочнікі
Дзед Базыль жыве адзін. Жонка памерла, а дзеці ў горадзе працуюць. Сумуе, але з працай сябруе. Узяў граблі і пайшоў у агарод. Там расце бульба і розная агародніна. Спыніўся каля градак з бульбай. Яна не ўзышла яшчэ, а глеба пакрываецца зялёнымі лісточкамі пустазелля. Гэта зелле высмоктвае з зямлі сокі, якія спатрэбяцца бурачкам і агурочкам, бульбачцы і клубніцам. Знішчаць пустазелле трэба хутчэй.
Шчыруе стары, тасуе граблямі глебу, перамешвае яе, адрывае карэньчыкі пустазелля, пакідае іх наверсе. Хай засыхаюць на сонцы. Апрацаваў адну градку, перайшоў на другую. Азірнуўся і ўбачыў на першай маленькую птушачку. Пліскай завецца. Часта ківае галоўкай, доўгім хвосцікам памахвае, штосьці збірае. А то ўспырхне, схопіць казяўку, якая ўцячы хоча, зноў апусціцца на зямлю, шнуруе вакол дзеда, падбягае да яго, ціха папісквае, быццам гаворыць з дзедам. Спыніўся стары, запытаў ціха:
– Што сказаць мне хочаш, плісачка?
– Дзякуй, дзядуля.
– За што?
– Што хатку мне змайстраваў і павесіў у садзе, а сёння снеданнем частуеш. Я ў доміку дзетак гадую. А табе памагаць прыляцела з казяўкамі, чарвячкамі, вусенямі змагацца.
– І табе дзякуй, маленькая памочніца. Пустазеллю дам рады, а з насякомымі не спраўлюся без цябе. Памагай, памагай!
Плісачка схапіла чарвяка і паляцела.
– Куды ж ты ўцякаеш, маленькая?
– Не ўцякаю, а дзеткам гасцінчык смачненькі занясу, каб раслі хутчэй.
Неўзабаве плісачка зноў апусцілася на градку, стала бегаць і шукаць шкоднікаў.
– Маленькая ты, плісачка, ды ўдаленькая. Дзякуй за дапамогу!
– Несправядлівы ты, дзядуля, – засвісцеў шпачок на яблыні.
– Чаму несправядлівы?
– Плісачку толькі хваліш, дзякуеш ёй.
– Дык яна ж збірае шкоднікаў, побач бегае.
– Ранняя птушачка носік чысціць, а твая плісачка вочы працірае. І мы памагалі табе.
– Чаму ж цяпер няма шпачкоў каля мяне. Баязліўцы вы?
– Асцярожныя, а не баязліўцы. Ды не такія соні, як ты з плісачкай. Мы наеліся і адпачываем. Не спі так позна, а ўставай раней ды паглядзі, як мая сямейка шчыраваць будзе.
– І прыйду. Пагляджу-у!
Назаўтра дзядуля раней устаў і пайшоў на агарод. Паглядзець трэба бульбачку, калі пачала ўсходзіць, і словы шпачка праверыць. Спыніўся за плотам, зірнуў на градкі. Сапраўды, шпачкі ўжо шчыруюць тут. То адзін шпачок, то другі хапае шкоднікаў.
– Дзякую, шпачкі, шкоднікаў на дрэвах знішчаеце. І вы малайцы! Сапраўдныя памочнікі!
Так усё лета сябруюць маленькія памочнікі з дзедам, дзякуюць яму, што домікі змайстраваў. Песнямі радуюць. Сапраўдныя памочнікі, надзейныя сябры.
Вельмi добрая казка.