Казкі сучасных чараўнікоў

Жыў-быў у бабулі певень –
Залаты, як сонца, грэбень.
Шпоры, нібы ў генерала.
Забіяка – гэткіх мала!..

Часта певень-забіяка
Крыўдзіў Жуліка – сабаку
І бабуліну суседку
Не пускаў у хату зрэдку.

Стала пеўню не да смеху:
Да бабулі ўнук прыехаў
Летнім ранкам са сталіцы
І нікога не баіцца.

– Як? Мяне – і не баіцца? –
Кажа певень, – будзем біцца!..

Малюнак Кацярыны Білан

Стаў Андрэй у поўны рост,
Цап крыўдзіцеля за хвост:
– Я нікому і ніколі
Крыўдзіць сябра не дазволю!..

Ходзіць певень дужа хмуры:
Абсмяялі нават куры.
Ды зусім ён не круты,
А чаму – кумекай ты!..

Уладзімір МАЗГО